Na e momentunan aki un tim di eksplorashon (surveyteam) di e programa oropeo di Galileo bou di guia di ministerio di Infrastruktura i Maneho di Awa (I&W) ta na Boneiru pa un bishita di orientashon. Komishon Oropeo ta buskando un sitio den área karibense ku ta adekuá pa instalashon di un asina yamá ‘sensorstation’ na benefisio di e proyekto di Galileo, ku ta un sistema mundial di nabegashon pa medio di satélite. Den área karibense Boneiru ta un di e kandidatonan.
Gobièrnu hulandes a reakshoná positivamente riba un petishon for di Bruselas pa pone posibel ubikashonnan den parti karibense di Reino komo kandidato. Seguidamente ministerio di Infrastruktura i Maneho di Awa a aserká Kolegio Ehekutivo di Boneiru. Kolegio Ehekutivo di Boneiru en prinsipio ta dispuesto pa koperá, bou di kondishon ku e proyekto no ta stroba otro desaroyonan riba nos isla.
For di siman pasá e tim di eksplorashon ta investigando aptitut di e dos ubikashonnan: Water- en Energiebedrijf Bonaire (WEB NV) na Barcadera i Bonaire International Airport (BIA). Nan a bishitá ámbos ubikashon den presensia di diputado Elvis Tjin Asjoe i e gerensianan di WEB i BIA. E siman aki ta konkluí e investigashon.
Mas despues durante e aña aki Komishon Oropeo lo hasi un eskoho for di tur e siteonan ku a investigá. Den kaso ku e eskoho bai pa Boneiru, e ora ei esei lo krea empleo indirekto, tantu den fase di desaroyo (entre otro trabou di konstrukshon) komo na momentu ku una bes e stashon na tera ta operashonal. Den e kaso ei lo trata prinsipalmente di suministradó. E trabou mes ta rekerí konosementu teknológiko spesífiko di nivel haltu. Pa esei lo reklutá un kantidat (limitá) di eksperto for di eksterior, pero esei no ta kita ku e proyekto ta ofresé oportunidat pa profeshonalnan boneriano tambe.
E proyekto di Galileo ta e proyekto di nabegashon espasial oropeo mas grandi di tur tempu. Ta un sistema sivil (pues no militar) mundial di nabegashon pa medio di satélite, ku e organisashon kosmonóutiko oropeo ESA i Komishon Oropeo a desaroyá. For di 2018 e ta operashonal i ta enserá desenas di luna artifisial i stashon na tera